काठमाडौं, ८ पुस । सशस्त्र प्रहरी बलले पशुपति मन्दिर क्षेत्रमा रहेको भष्मघाटमा रहेको त्यागी बाबाको आश्रमबाट तीन मानव खप्परसहित दुई बाबालाई सोमबार पक्राउ गरेको छ । पक्राउ पर्नेमा त्यागी बाबा र डमरु बाबा रहेको सशस्त्र प्रहरीले जनाएको छ ।
मादक पदार्थ सेवन गरी त्यागीसँग झगडा गर्न गएका डमरुले मानव खप्परका विषयमा कुरा गर्दै गरेको बेला सशस्त्र प्रहरी बल पशुपति मन्दिर सुरक्षा बेसबाट नियमित गस्तीमा रहेको टोलीले उनीहरुलाई पक्राउ गरेको सो बलका प्रहरी नायब उपरीक्षक अजय छत्कुलीले जानकारी दिनुभयो ।ती मानव खप्परमध्ये दुई वटा करिब एक सय वर्ष पुरानो रहेको बताइएको छ । मानव खप्परमध्ये दुई वटामा कालो धुँवा लागेको र पुरानो देखिएको छ । अर्को मानव खप्पर हालसालै मात्र खनेर निकालेको जस्तो देखिएको छ र यसमा माटो पनि टाँसिएको छत्कुलीले जानकारी दिनुभयो । पक्राउ परेकालाई थप अनुसन्धान गरी नेपाल प्रहरीलाई बुझाउने तयारी गरिएको छ ।
.png)
