उदयपुर, पुस २३ - जंगली हात्तीको समूहले दुई सातायता तपेश्वरी - १ रामनगर वस्तीमा ४६ घर भत्काइ दिएको छ । हात्तीले घर भत्काए पछि पीडित खुल्ला स्थानमा रात बिताउन बाध्य भएका छन् । जाडोको समयमा खुल्ला स्थानमा रात बिताउनु पर्दा सर्वसाधरण समस्या परेका हुन् । कोसी टप्पु वन्यजन्तु आरक्षण क्षेत्रबाट आएका हात्तीले १५ दिनदेखि लगातार घर भत्काई रहेको स्थानीयले बताए । हात्तीले ब्रम्हदेव मरिक, जागेश्वर सिंह, राचन्द्र महत्तो, तीर्थमान तामाङ, गोपाल फूयल, भूलाइ चौधरी, बालेश्वर यादव घर भत्काई दिएको प्रहरी चौकी तपेश्रीले जनाएको छ । त्यसैगरी जितेन मेहेता, भागेन यादव, गंगा महतो, सूरज महतो, गंगाराम महतो, सुबदबहादुर भट्टराई, रगुनी साह, अनिल भूजेल, डोमि केविरत, राते मगर, जंगबहादुर मगर, डुराइ चौधरी लगायत ४० भन्दा बढि परिवारको घर भत्काई दिएको प्रहरी चौकीका प्रहरी साहयक निरीक्षक चन्द्रनारायण सिंहले बताए । 'दुई सातादेखि प्रत्येक दिन राति हात्तीले रामनगर वस्तीमा प्रवेश गरेर घर भत्काई रहेका छन्' उनले भने 'प्रहरी र गाउँले मिलेर प्रत्येक दिन हात्ती धपाई रहेका छौं ।' तर पहिलो दिन धपायो भोली पल्ट राति आएर फेरी आर्को घर भत्काई दिने गरेको उनले बताए । 'हात्तीले घर भत्काई दिएपछि पुसको जोडोमा समेत खुल्ला आकासमै रात बिताउनु परेको छ' स्थानीय मनोजकुमार यादवले भने, 'घर भत्काएर खाद्यन्य समेत नष्ट गरिदिएपछि भोकै बस्नु पर्ने अवस्था आएको छ ।' हात्तीले कुल्चिएपछि तरकारी खेती समेत नोक्सनी भएको उनले बताए । अन्य अन्नबालीको खासै उव्जनी नहुने रामनगर वस्तीका स्थानीय तरकारी खेतीबाट गुजरा गर्ने गर्छन । तरकारी बिक्रिबाट खरिद गरिएको अन्न हात्तीले नष्ट गरिदिदाँ भोक भोकै बस्नु पर्ने बाध्यता रहेको अर्का स्थानीय कारी ठाकुरले बताए ।'बर्ष भरीको कामइले खरिद गरेको अन्न हात्तीले एकै रातमा नष्ट गरिदिन्छ' उनले भने । 'बर्षेनी हात्तीले रामनगर वस्तीमा आंतक फैल्याउदै आएको छ' काँग्रेस नेता अशोक कार्कीले भने 'हात्ती नियन्त्रणका लागि पटक पटक माग गर्दा समेत सम्वन्धित निकायले वास्ता गरेन ।' हात्ती नियन्त्रण गर्न सकिएन भने रामनगरका बासिन्दा बसाई र्सनुको विकल्प नभएको उनले बताए ।
.png)
